Participarán no acto de presentación: o director da Casa de Galicia en Madrid, Juan Serrano López; Dominique Roujou de Boubee, de Terroir en Botella; e Laura Rodríguez Herrera, editora.

Mariano Fisac xa se propuxo ensinarnos a beber bos viños sen arruinarnos desde o seu blogue, Mileurismo gourmet. Agora, desde as páxinas deste libro, deléitanos mostrándonos unha Galicia de uvas e viñedos que devolven o respecto á terra, producindo viños que espertan todos os sentidos antes de chegar ao padal. Este libro está dirixido a quen quere apreciar e gozar o viño sen grandes aparatos. Inclúe na súa segunda edición revisada e actualizada, novas adegas e viños.

Pasou moito tempo desde que Galicia entre copas vise a luz; foi o froito dunha viaxe, case iniciático, de probar, coñecer e, dalgunha forma, mostrar —como ata entón non se fixo— a realidade dun territorio que nuns poucos anos pasara da práctica irrelevancia —máis aló do folclórico— a converterse nunha das referencias mundiais do viño emerxente de calidade: Galicia.

Desde que o libro saíu á rúa (2015) ocorreron moitas cousas. En primeiro lugar, Galicia profundou na súa condición de referente gastronómico español e europeo, en boa parte grazas aos seus singulares viños, estandartes do produto de calidade na rexión, tanto en restaurantes multiestrellados como en vinotecas e tabernas locais, cada vez máis orgullosas de servir —con coñecemento e calidade— os revolucionarios viños galegos.

Pero non todo foron cousas boas. Nas conversacións cos produtores que protagonizan este novo libro, queda claro que o cambio climático ha pasado de ser unha preocupación a unha realidade á que facer fronte.

No ámbito da elaboración, houbo adaptación e afortunadamente a continuación dunha historia de éxito. Hoxe en día, os viñadores galegos poden permitirse facer viños auténticos, sen necesidade de que se parezan a outra cousa, non só porque terán o seu público, senón porque os seus acenos de identidade son case unha garantía de éxito. Froito diso, proxectos xa consolidados no momento no que ser publicaba "Galicia entre copas" non fixeron outra cousa que buscar ampliar os seus viñedos. Tamén vimos nestes anos como os proxectos que entón rompían o seu cascarón hoxe están máis que consolidados.